Wednesday, October 24, 2007

المدينه الغير ترفيهيه


انا واعوذ بالله من كلمة انا من مواليد 1984

يعني قبل الازمه ب 6 سنوات

اكيد بال6 سنوات هذي رحت المدينه الترفيهيه واكيد لي فيها ذكريات وصور

وهم رحت الترفيهيه بعد هال6 سنوات وبعد ما اعادوا بنائها مثل ماكانت بنفس الالعاب مع تغيير لعبه او لعبتين

والحين انا عمري 23 سنه وهالصور والذكريات مو راضيه تصير من الماضي

لانه في كل مره اروح الترفيهيه ما الاقي الا تغيير بسيط لايذكر وساعات مامنه فايده

والالعاب قديمه ومغبره ومكسره وطبعا الكتابات والذكرى المكتوبه على الالعاب تنسيك اللعبه

وبعدين يقولون ليش تسافرون بالصيف؟؟

ليش ما تنمون السياحه الداخليه؟؟

انا عن نفسي مستعده انمي السياحه بالكويت

بس وين نروح؟؟ وشنو نسوي؟؟

واخليكم الحين مع بعض الصور الاثريه للمدينه الغير ترفيهيه




البوابه من داخل


البوابه تفشل


الجندول

الدردور
الماي فيه ماده لزجه

وريحته خايسه


عالم المستقبل((المفروض))بس لازم يسمونه

ماضي المستقبل





الصاله اللي الالعاب فيها من سنة يدي




العالم العربي

على مااعتقد يعني السندباد والاحصنه الدواره

---------------------------------



وفي بعد العاب اثريه اكثر ولو بحطهم كلهم ببوست واحد مايكفي



سؤال واحد ودي اسمع جوابه



متى نتطور؟؟؟متى؟؟

وهم الللي شايف انه مدينة الترفيهيه ترفيهيه يقول يمكن اهو شايف شي حلو ويديد وترفيهي

29 comments:

حلم جميل بوطن أفضل said...

شخصياً أرى مستوى المدينة الترفيهية متوسط. المشكلة هم يستهدفون فئة عمرية معينة هي الأطفال و يستقدمون الألعاب الرخيصة المستعملة من لبنان و يتناسون الفئات العمرية الأخرى و هي المراهقين و الشباب و الكبار

ثم المانع من بناء مدينة ترفيهية متكاملة كصالات التزلج و ألعاب الفيديو و البولنغ و صالات السينما و ربما المراسم الحرة و المكتبات

الشركة بإدارتها السيئة مشغولة في المشاريع العقارية و بوقات البي أو تي و تتناسى دورها التشغيلي فهي تحظى بأراضي مميزة ممنوحة لها من الدولة و تفكر بكيفية توزيعها و الإستفادة من ذلك. و لا تفكر بجدية بتطوير قطاع السياحة بالكويت

قبل سنين مضت قام أحمد الفهد بتعيين نبيلة العنجري كوكيلة مساعدة للسياحة تحت مظلة وزارة الإعلام !! رغبة منه بالسيطره على توزيعات الأراضي و المشاريع و كانت تجربة فاشلة تماماً و تم فك هذا القطاع بعد شهور قليلة

تحياتي لك مع العودة من خسائر العيديات

Q8Disaster said...

شخباري المدينة الترفيهية
انا اقترح لو يحولونها مكان تراثي ابرك لأنها قديمة والالعاب اقدم والي يضحكني عالم المستقبل لووول خلاص صار ماضي

قبل يوم كنا صغار كنا نستانس على الالعاب وكانت المدينة كله زحمه الحين اعتقد انها تصفر فاضية وحتى الصغار مايستانسون عليها

واكيد وراء تدهور المدينة الترفيهية مستفيدون يبلعون بهالارباح

عالعموم يعطيج العافيه على الموضوع

سيدة نفسي said...

السلام عليكم والاكرام

لا ادري الى متى سنعيش هذه الكذبة العظيمة بأن الكويت بخير ؟

الكويت منذ الغزو العراقي الغاشم وهي تسير على رجل واحدة على أمل اللحاق بباقي دول الخليج

والمشكلة فعلا بأن لا احد يعطل سيرها سوى من هم محسوبون علينا كأولي الامر منا وهم سلطات الكويت السلطعونات

المواطن الكويتي

بكى
شقى
تعب
بس باقي ينتحر

حتى متعته اصبحت بمرافق بالية
وفوق كل هذا غالية


وان اشتكينا يقومون بإفتتاح المزيد المزيد من المطاعم

وقف عقلك وكبر كرشك

ياوطن .. رحمك الله

kuwaitya_7saweya said...

حلم جميل بوطن اجمل:
شلون ترى مستواها متوسط واهم يستخدمون العاب مستعمله
وتضيق الخلق وكله حق اليهال

وعلى قولتك اذا الاداره سيئه شنو تتريا منهم

ويلا معلش تعوضها بالعيد الياي
-------------------------------
Q8 Disaster:
عالم المستقبل صار عالم الاثار والانتيكات
واي قبل اذا قالوا بنروح الترفيهيه جنه رايحين ديزني لاند نطير من الوناسه
الحين اليهال شافوا العاب وديزني وغيرها وغيرها
يعني الترفيهيه بالنسبه لهم جنهم رايحين حديقه المنطقه
والله يعافيك
------------------------------
سيدة نفسي:
وعليكم السلام
مرافق باليه وغاليه
صدقتي والله
وهذي الكويت صل على النبي

Selezya said...

انا رايي من رايي حلم جميل بوطن افضل

اكيد شغلات وايد تنقصها .. والالعاب صارت وايد قديمة .. مستانسين بهاللعبه اليديد البرق .. واهيا ما تسوي شي بألعاب بره

بس شوفي ترا الكويت من ناحية المدن الترفيهيه اللي فيها بالخليج اهيا احسن وحده صراحه .. وهالشي خليجيا فقططط
اما بره صراحه ماتسوى شي

kuwaitya_7saweya said...

عدل كلامج وكلام حلم
انا سمعت انه بسوون ديزني لاند بالامارات
فبعدها مدينة الترفيهيه بتصير صفر عالشمال

Fahad Al Askr said...

قريبا جدا

على نفسها جنت براقش said...

لها زباين
صدقينى لان سعرها معقول قياساً بحديقة الشعب
تخيلى عند 3 اولاد مثلا و تبين تونسينهم
بفرض راتبك 600 و زوجك 800
حسبى
اجار 400
مصرف اكل 300
معاش خادمة 40
فاتورة زين انتى و زوجك 60
كهربا و ماى و شى يخترب بالشقة 40
مصروف لك و لزوجك 200
طبيب خاص 40
بانزين 30
لعبة بطلعة حق واحد اواكثر من عيالك 30
صالون 30
انعزمتى على عرس عندك البدلة بس مكياجك و شعرك 60
طلعة عشا مع زوجك او صديقاتك 60
هذا كله 1230
يبقى من معاشكم 170
لو تروحين حديقة الشعب بتصرفين اقل شى 60
و اذا الترفيهية40
يعنى متى بتشترين بيت او بتجمون
موحرام

فترفيهية والا القهوة الشعبية
و لا مكان ما يسوا تقطين فيه فلوس بس تقولين علشان العيال

والله اعلم

kuwaitya_7saweya said...

علن نفسها جنت براقش:
انزين اوديهم مو مشكله وحتى لو غاليه هم اوديهم بس ماكو العاااااااب
حفظنا الالعاب ولاعت جبدنا منهم
وكل شي قديم
وانا مبتلشه بعيال خواتي
افتر فيهم من مكان لي مكان

مشاري said...

kuwaitya_7saweya

المدينه الترفيهيه موقعها كبير جدا
بس الالعاب بها بصراحه خرده
واتوقع ان الحديد اللي فيها خلاص صدي

بالاول كنت اروحلها في عام 1985
كنت كل لعبه بتذكره(قطاع خاص) نفس حديقه الشعب حاليا
بعدها بعد الغزو صار تذكره شامله
ادخل والعب علي كيفك

هذي ميزتها الوحيده لعب ببلاش
بس بصراحه ما قمت اروحلها منذ عام 1995

kuwaitya_7saweya said...

هلا والله اخ مشاري الهاجري نورتنا بمرورك الكريم

مو بس الحديد صدى كل شي فيها صدى

صج تذكره شامله بس ماتشمل الدردور ولا البرق ولا الاعصار ولا المنخل مادري المكسر
وبعد في بس مااذكرهم
والالعاب اللي تشملها التذكره محد يلعبها الا اليهال
:)

Sulaiman_Q8 said...

اختي عمرنا ماراح نتطور دام ماشين على هذا الطريج لا تطور بعد اليوم


ماقول الا عظم الله اجرج يا السياحة بالكويت

kuwaitya_7saweya said...

عدل كلامك
اجرنا واجرك
:)

Aldenya said...

يوم كنا صغار
كانت الروحة لمدينة الترفيهيه بمثابة العيد
وخصوصا وانها بعيده عنا
وما نروح لها إلا بالغصب

أما الحين
رحت لها قبل سنه ونص تقريبا
خفت على نفسي انى أركب بعض الالعاب
وخصوصا اللى يطيرون فوق

بروحه الحديد مصدي
والالعاب مسكربه

الواحد يخاف على عمره

مع انه المفروض
يقومون بتجديد جميع الالعاب الموجودة
وما أظن انهم بيجدونها الحين
إلا إذا صارت حادثة شنعيه الله لايقول

بس هذا الصج :/


ذكرتينا باللى مضى يالحساوية
أيام الترفيهيه والالعاب والوناسة :>

كــويـت الـيـوم said...

بالمشمش
او
اذا حجت البقر على قرونها
او
اذا تحررت فلسطين

kuwaitya_7saweya said...

aldenya:
اي والله الواحد يخاف يركب الالعاب
وصح ماراح يجددونها الا بعد مايفوت الفوت
-------------------------------
كويتي:
لووووول
صح صح

Najmah said...

شخباري المدينة الترفيهية :)

اييي والله ليش ماتطورون المعالم السياحية

والله الواحد مايدري وين يروح

ملينا من المجمعات والمطاعم

Barrak said...

شتبون بعد شتبون

اصلا يورو ديزني ماتقايش المدينة الترفيهيه
آل ترفيهيه آل

فتى الجبل said...

نتطور لي حجت البقر على قرونها

kuwaitya_7saweya said...

najmah:
ماراح يتطورون كلش
وماكو صج الا المطاعم والمجمعات
------------------------------
barrak:
لوووووووووووووووووول
اي عدل ماتقايش
-----------------------------
فتى الجبل:
ايييييييي ماراح تحج
ولا راح نتطور

خسرتني للأبد said...

الســ عليكم ــلام
اشلونج اختي
و الله تبين الصج اشلون تبينهم يعدلون الترفهية و انتي اتدشين بلاش
لازم انتي تدفعين فلوس و اتساهمين في تعمير الترفهية
ما يصير اختي انتي اتدشين بلاش و تبين الترفهية تتطور
دفعي

kuwaitya_7saweya said...
This comment has been removed by the author.
kuwaitya_7saweya said...

خسرتني للأبد:
وعليكم السلام
لوووووووووووووووووووول
هههههههههههههههههههههههههههه
اخوي
لا مو ادش ببلاش انا انط من السور
اوفر بعد عند الباب يمكن يمسكوني
ويقولون لي دفعي حزتها شسوي
لووووووووووووووووووووووول

وبعدين شكو يطورونها على حسابي لايكون ترفيهيتي وانا مادري

ezain_kilah said...

إي والله صاجة...إحنا ما راح نتطور إلا إذا انفتح الباب للشباب يبدعون ويساهمون بأفكارهم, ولأن الجهات الحكومية ما تشجع والتجار مطنشينا, أنا أقول إنه إحنا نكسر الباب ونتعاون مع بعضنا لتحقيق طموحاتنا ومشاريعنا

ولنا في شباب الإمارات أسوة حسنة-ولو إن ظروفهم أحسن منا من حيث التشجيع وتسهيل تتطبيق أفكارهم- إلا إن عيال بطنها قدها وقدود

وايد حلو موديل مدونتج
7adha NaNiN!

kuwaitya_7saweya said...

على قولتج بس جان زين يفتحون الباب لنا والله نبدع
شباب الامارات وصلوا القمر
والله يوفقهم

thank you
عيونج الحلوه

فريج سعود said...

يوم البحار او المقاهي الشعبية اونس
انا كاره الترفيهية من الاشكال الغريبة الي اشوفها هناك تقولين يايين من كوكب ثاني

kuwaitya_7saweya said...

فريج سعود:
اي والله عدل نسيت اذكر هالنقطه
لوووووووووووووووووووووووووول
وشدعوه يوم البحار مافيه من هالاشكال

Anonymous said...

لا شفيج شالوا اللعبة اللي فيها مناظر و جامات
شالوها لما الكل دل طريج الطلعة و الجامات صارت وصخة اللي لا يمكن لأحد ان يتساءل و يقول هذي جامة ولا لأ! مادري أطوف ولا لأ!

ولا اللعبة الطويلة اللي مادري شسمها تصعد لي فوق و تنزل
ريحتها ريحة دلاغات و مرة وقفت على ناس.. صراحة الحين محد يركبها الا اللي ما ركبوها كلش و يبون يجربونها.. وبعدين يحرمون يركبونها بعد

kuwaitya_7saweya said...

لووووول اهم شي ريحة الدلاغات
انا ماركبتها ولا افكر اركبها كلش